ხორცის რულეტი არომატული შიგთავსით
აუცილებლად მოამზადეთ ეს გემრიელი ხორცის რულეტი არომატული შიგთავსით, ძალიან მოგეწონებათ!
მასალა:
- 2 ცალი ქათმის მკერდი ან 500 გ ღორის რბილი ნაჭერი
- პატარა კონა ქინძი
- 1 ცალი ხახვი
- მარილი, პილპილი, ნიორი, ბროწეულის მარცვლები გემოვნებით
- ზეთი შესაწვავად
მომზადება:
ქათმის მკერდი გაჭერით ორ თხელ ჰორიზონტალურ ნაჭრად ან ღორის ხორცის რბილი ნაჭერი დაჭერით თხელ მართკუთხა ნაჭრებად და კულინარული ცელლოფანის ორ ნაჭერს შორის მოქცეული ფრთხილად დაბეგვეთ. თითოეული ნაჭერი შეკმაზეთ მარილით და პილპილით ორივე მხრიდან, ცენტრში ზოლზე მოაყარეთ წვრილად დაჭრილი ხახვი, ქინძი, გაჭყლეტილი ნიორი გემოვნებით და ბროწეულის მარცვლები. ხორცი გადაახვიეთ და მიეცით რულეტის ფორმა. რამოდენიმე ადგილას შეკარით ძაფით ან ხის ჩხირით. შეწვით ზომიერ ცეცხლზე ცხიმიან ტაფაზე ყველა მხრიდან.
ეცადეთ რულეტი ძალიან სქელი არ გააკეთოთ, რომ ცენტრში უმი არ დარჩეს. შემწვარ რულეტებს მოხსენით ძაფი და სუფრასთან თბილი მიიტანეთ.
ასე მომზადებული რულეტები ძალიან გემრიელია სხვადასხვანაირ კარტოფილის გარნირთან და (ან) მწვანე სალათთან ერთად.
მიირთვით გემრიელად! 
