შვრიის და ქოქოსის კექსი ყავით
შვრიის ძალიან გემრიელი ნამცხვარი ქოქოსის და ყავის არომატით.
მასალა:
- 4 კვერცხი
- 100 გ კარაქი
- 250 გ შაქარი
- 1 შეკვრა ვანილიანი შაქარი
- 200 გ შვრიის დაფქული ფანტელი
- 50 გ შვრიის ნაზი, დაუფქვავი ფანტელი
- 50 გ სახამებელი (სიმინდის, ან კარტოფილის)
- 2 ჩკ გამაფხვიერებელი
- 250 გ მაწონი
- 50 გ ქოქოსის ფანტელი
- 2 სკ ხსნადი ყავა
- 1 სკ კონიაკი
- 2 სკ კაკაო
- 50 გ მუქი შოკოლადი და ცოტაოდენი ქოქოსის ფანტელი მოსართავად
- მწიკვი მარილი
მომზადება:
ღუმელი 180 გრადუსზე გაახურეთ.
კვერცხი ათქვიფეთ შაქართან და ვანილთან ერთად, შეათქვიფეთ დარბილებული კარაქი, კონიაკში გახსნილი ყავა და მაწონი გამაფხვიერებლით. დაამატეთ წინასწარ არეული შვრია, ქოქოსი, სახამებელი, კაკაო და მარილი და კარგად აურიეთ. ცომი ჩაასხით ქაღალდჩაფენილ ფორმაში ან კარაქწასმულ სილიკონის ფორმაში და შედგით ღუმელში დაახლოებით 40-50 წუთით. მზაობა აუცილებლად ხის ჩხირით შეამოწმეთ.
შეგრილებულ კექსს მოასხით დამდნარი შოკოლადი და მოაფრქვიეთ ქოქოსის ფანტელი.
მიირთვით გემრიელად!
