თხილიანი ფხვიერი ნამცხვარი
ამ ფხვიერი ნამცხვრების ავტორია ახალგაზრდა ექიმი ჯოანა ელერი, რომელმაც გადმომცა რეცეპტი და გამასინჯა კიდეც ეს გემრიელი ნამცხვარი. სინჯეთ აუცილებლად, არაჩვეულებრივია და ძალიან მარტივი მოსამზადებელი.
მადლობას ვუხდი ჯოანას რეცეპტისათვის. 
მასალა:
250 გ კარაქი
350 გ ფქვილი
2 კვერცხი
150 გ შაქარი
50 გ ყავისფერი შაქარი
2 შეკვრა ვანილიანი შაქარი
½ შეკვრა გამაფხვიერებელი
200 გ დაფქული თხილი
მომზადება:
კარაქი, შაქარი, კვერცხი, ვანილი, გამაფხვიერებელი და თხილი კარგად შეურიეთ ერთმანეთს. ბოლოს შეაზილეთ ფქვილი და მოზილეთ მკვრივი ცომი, რომელიც ხელზე აღარ მიგეწებებათ. ცომს მიეცით მილის ფორმა და ჩამოჭერით წრეები. ეს ცომის წრეები დააწყვეთ ქაღალდდაფენილ საცხობ ფურცელზე, ხელით მსუბუქად დააწექით და გამოაცხვეთ წინასწარ 175 გრადუსზე გახურებულ ღუმელში დაახლოებით 10 წუთი, ვიდრე ნამცხვრები ოქროსფერს არ მიიღებს.
თხილიანი ფხვიერი ნამცხვარი გემრიელია თბილიც და ცივიც.
მიირთვით გემრიელად!
