შოკოლადის მინანქარი კაკაოთი
ეს გემრიელი მინანქარი შეგიძლიათ ტორტების, ნამცხვრების, ხრამუნების და ნებისმიერი დესერტის მოსართავად გამოიყენოთ. მინანქარი გაცივების შემდეგაც რბილი რჩება და ნამცხვრის დაჭრისას არ ტყდება.
მასალა:
- 150 გ შაქარი
- 1 შეკვრა ვანილიანი შაქარი
- 3 სკ კაკაო
- 6 სკ რძე
- 50 გ კარაქი
მომზადება:
შაქრის, ვანილიანი შაქრის და კაკაოს ნარევს დაამატეთ რძე, კარგად აურიეთ და დადგით ნელ ცეცხლზე. ერთგვაროვანი მასის მიღების შემდეგ დაამატეთ ოთახის ტემპერატურის კარაქი, მუდმივი მორევით მიიყვანეთ ადუღებამდე და გადმოდგით ცეცხლიდან.
გაითვალისწინეთ, რომ ცხელ მინანქარს თხელი კონსისტენცია აქვს და ნამცხვრიდან ადვილად ჩამოიღვენთება, გაგრილებული სქელდება და ბლანტი ხდება. ამიტომ საჭიროა მინანქრისათვის სწორი ტემპერატურის შერჩევა თქვენი გეგმების შესაბამისად. თუ მთელი ნამცხვრის დაფარვას აპირებთ მინანქრით, ან გსურთ ნაწილობრიბ მოასხათ, აცალეთ მინანქარს შეგრილება და შესქელება და ასე გამოიყენეთ.
მიირთვით გემრიელად! 
კარგი იყო… მადლობაა ;)
სალომე, მიხარია, რომ მოგეწონათ :)