ყურძნის მურაბა
ქარვისფერი, გამჭვირვალე, სურნელოვანი, არომატული, განუმეორებელი!!!
შემოგთავაზებთ ძალიან არომატულ ყურძნის მურაბას. უკეთესია უწიპწო ყურძენი გამოიყენოთ. ძალიან გემრიელია ჩაისთან, ნამცხვრებში. ადვილი მოსამზადებელია, სცადეთ აუცილებლად.
მასალა:
- 3 კგ უწიპწო ყურძენი (დამარცვლული)
- 1 კგ შაქარი
- 450 მლ წყალი
მომზადება:
ყურძენი დამარცვლეთ, აწონეთ და გარეცხეთ.
მოზრდილ ქვაბში მოადუღეთ სიროფი შაქრით და წყლით. ზომიერ ცეცხლზე ადუღეთ 15-20 წუთი, შემდეგ ჩაყარეთ დამარცვლილი ყურძენი, წამოადუღეთ, ადუღეთ დაახლოებით 10 წუთი, გამორთეთ ცეცხლი და აცალეთ გაცივება. ასე გაიმეორეთ რამოდენიმეჯერ, ვიდრე ყურძენი არ მოიხარშება. მურაბა ღამით „დაასვენეთ“.
მეორე დღეს ერთი კოვზი ცივი მურაბის წვენი დაასხით თეფშზე და კოვზის წვერით “გაავლეთ ხაზი”. თუ კოვზმა სუფთა კვალი დატოვა და თეფში ზოლად გამოჩნდა, ეს ნიშნავს, რომ მურაბა მზადაა. თუ არა, დუღება გააგრძელეთ.
ქილის სახურავები ჩაყარეთ ცხელ წყალში. სუფთა ქილებს გამოავლეთ ცხელი წყალი, ჩაასხით ქაფქაფა მურაბა და მოახრახნეთ ცხელი ხუფები.
ყურძნის მურაბა შეინახეთ მშრალ და გრილ ადგილას.
მიირთვით ზამთარში გემრიელად! 
შენიშვნა: დღეს საღამოს ჩემი შვილის თხოვნით მაჭკატები გამოვაცხვე. მომზადების პროცესში რომ ვიყავი, თვალი ქილებში ჩასასხმელად მომზადებული ყურძნის მურაბისაკენ გამექცა… ბევრი რომ არ გავაგრძელო, მაჭკატები და ყურძნის მურაბა ერთმანეთს ძალიან მოუხდა. გირჩევთ, აუცილებლად გასინჯოთ.
